أهلا وسهلا بك إلى منتديات طموحنا.



الصداقة الصادقة

رنيم و داليا اصحاب من المدرسه و كل سنه بيكونوا مع بعض صداقتهم بتقوى أكتر من اللى قبلها, كل شىء بيحصل مع واحده فيهم لازم التانيه تعرفه . فى أول



الصداقة الصادقة


النتائج 1 إلى 4 من 4
  1. #1

    تاريخ التسجيل
    Sep 2015
    المشاركات
    61
    الجنس
    أنثى

    افتراضي الصداقة الصادقة

     
    الصداقة الصادقة




    رنيم و داليا اصحاب من المدرسه و كل سنه بيكونوا مع بعض صداقتهم بتقوى أكتر من اللى قبلها, كل شىء بيحصل مع واحده فيهم لازم التانيه تعرفه .
    فى أول سنه فى المرحله الثانويه كل واحده كانت فى مدرسه بعدوا عن بعض شويه و داليا سافرت فى السنه دى للمصيف بعدت عن رنيم فتره الصيف , قابلت داليا شاب و عطاها رقم موبيله على أمل انها تتصل بيه ,رجعت داليا من المصيف و فى مره قابلت رنيم و حكتلها على كل اللى حصل معاها فى المصيف و قالتلها أنها قابلت شب و كان جميل و عطاها رقم موبيله كمان قعدوا هما الاتنين يضحكوا و أتفقوا أن السنه الجديده دى لازم الاتنين يكونوا مع بعض فى نفس المدرسه علشان يفضلوا مع بعض و فعلا رجعوا الاتنين فى مدرسه واحده مع بعض و علاقتهم بقت أكتر من
    الاول ,اتخرجوا من الثانويه جت مرحله اختيار الكليات و قرور انهم
    لازم يختاروا نفس الكليه مع بعض ,
    رنيم كانت عند داليا فى البيت و هما قاعدين بيقلبوا فى اللعب والاوراق بتاعت داليا وقعت ورقه مكتوب فيها رقم و اسم بصوا لبعضو ضحكوا و
    افتكرت داليا المصيف اللى كانت فيه و قابلت فيه الشاب الجميل .
    رنيم سألتها انتى كلمتيه قالتلها 'لا طبعا انا مش اتكلمت معاه خالص بصوا لبعض و قالوا ما تيجى نلعب لعبه و نجرب داليا قالتها ماشى بس انتى اللى تتكلمى قالتلها ماشى
    مسكوا الموبيل و طلبوا الرقم رد عليهم الشاب الو اول ما الشاب رد قفلوا الموبيل و قعدوا يضحكوا

    لقواالموبيل بيرن تانى مسكت رنيم الموبيل و ردت :الو
    :قالها الرقم ده اتصل بيا دلوقتى و قفل مين حضرتك
    رنيم : انت سامر
    سامر :ايوه يا فندم حضرت أحد العملاء معانا
    رنيم : اه بس هو انت بتشتغل ايه بقى ؟؟
    سامر : قالها بشتغل ايه أمال حضرتك اتصلتى ليه؟؟
    رنيم : انااتصلت اشوفك بقى بعد السنين دى وصلت لايه .
    . سامر : سنين ايه هو انتى تعرفينى منين بقى ؟!
    رنيم : واضح ان ذاكرتك ضعيفه ولا انت بتدى رقمك لكل الناس اللى بتقابلهم كل سنه فى المصيف ؟ ها بقى
    سامر: ضحك قالها كل اللى اديتهم رقمى فى المصيف اتصلوا الآ واحده بس دى رمت الرقم و مشيت ههههه بس شكلها رجعت اخدته تانى
    رنيم : هههههه انا لقيته طار و جه لحد عندى بعد ما مشيت اخدته
    سامر : طب و ليه ما اتصلتيش من يومها و ايه فكرك بيا بعد السنين دى كلها ؟؟
    رنيم : يعنى اقفل خلاص ماشى مع السلامه بقى
    سامر : لالالا ما اقصدش انا قصدى كويس انك لسه فكرانى و كويس انى ماغيرتش الرقم بس انتى اسمك ايه انتى مش قلتى اسمك يومها ضحكتى و مشيتى
    رنيم : مش لازم تعرف اسمى

    * دخلت ام داليا بتنادى عليها رنيم تعالى تليفون ليكى سمع سامر اسمها
    سامر : قالها حلو رنيم برضوا شغال قومى ردى على التليفون و انا حكلمك تانى
    رنيم : مع السلامه .
    سامر : مع السلامه يا قمر .

    * قامت رنيم ترد على التليفون و رجعت تانى لداليا و قعدوا يضحكوا الاتنين على الموقف اللى حصل

    داليا : افرضى اتصل تانى حعمل ايه ؟ انا مش حعرف ارد عليه اقوله ايه
    رنيم : عادى ردى عليه ومش تقلقى ما انا كلمته بس خدى بالك ده سرنا ما حدش يعرف عنه حاجه غيرنا
    داليا : ماشى ربنا يستر احنا شكلنا اتجننا
    رنيم : يلا اهو نتجنن دلوقتى احسن ما نتجنن و احنا كبار بقى

    * روحت رنيم بيتها و قعدت داليا فى اوضتها و عدى ساعتين و لقت موبيل بيرن تانى

    ردت داليا : الو
    سامر : الو ايه يا رنيم انتى صوتك اتغير كده ليه
    داليا : لا انا مش رنيم انا صحبتها
    سامر : اهلا بيكى بس هو ده مش رقم رنيم
    داليا : لا ده رقمى انا رنيم كلمتك منه
    سامر : اهلا بيكى انتى اسمك ايه ؟
    داليا : انت عايز اسمى ليه انت بتتكلم مع رنيم مش معايا و رنيم مش موجوده انا رديت عليك علشان اقولك انها مش موجوده و خلاص
    سامر : طب ممكن تدينى رقم رنيم علشان اكلمها ؟
    داليا : لا مش ممكن رنيم لما تيجى ابقى اسألها و ممكن اخليها تكلمك و تديهولك حوصلها انك اتصلت تسأل عليها
    سامر : هو انا ضايقتك ؟؟ انا اسف مش اقصد بجد
    داليا : لالا ولا يهمك انا مش اتضايقت بكره ان شاء الله لمااشوف رنيم حخليها تكلمك
    سامر : شكرا ليكى و اسف كمان مره لو ضايقتك تصبحى على خير مع السلامه
    داليا : و انت من اهل الخير مع السلامه.

    * جه تانى يوم و اول ما صحيت داليا من النوم اتصلت على رنيم

    داليا : ايه يا بنتى صباح الخير الواد اتصل عليا امبارح و مش عرفت اتصرف و عايز يكلمك تانى اعمل ايه و طلب رقم موبيلك كمان بس انا مش ادتيهوله
    رنيم : ايه يا بنتى بالراحه انا لسه صاحيه و مش فاهمه منك بالراحه بقى ايه اللى حصل
    اقولك ما تيجى دلوقتى نفطر سوا و بعدين نشوف ايه الحكايه .
    داليا : طب خلاص اناجيالك افوق و اخد شاور و انزلك على طول
    بس اصحى بقى و فوقى كده علشان نشوف حنعمل ايه
    رنيم : اشطه يلا مستنياكى
    داليا : اشطه سلام

    *راحت داليا لرنيم فى البيت و دخلوا اوضه رنيم و حكت داليا لرنيم كل اللى حصل امبارح .

    رنيم : طب الواد طلع مؤدب اهو و مش اتصل عليكى تانى ايه المشكله
    داليا : يا بنتى هو مش اتصل لانى قلتله انى حقولك تتصلى عليه اتصلى بقى انتى عليه علشان مش يكلمنى تانى انامش عرفت اقوله ايه
    رنيم : طيب خلاص انا حكلمه بس اصبرى شويه انتى كده كده اليوم النهارده حتقضيه معايا ماما اتصلت على طنط و قالتلها حنوصلك بليل و انك حتقعدى اليوم كله معانا
    داليا : طيب ماشى
    *شويه و الموبيل رن تانى و هما قاعدين بيتفرجوا على التلفزيون بصت داليا ع الموبيل لقته سامر بصت لرنيم علشان تفهم انه سامر قامت
    رنيم : بقولك تعالى نقعد على الكمبيوتر فى الاوضه احسن الفيلم ده شكله ممل اوى

    دخلو الاوضه علشان ترد على سامر
    رنيم : الو ازيك
    سامر : ازيك يا رنيم عامله ايه ؟
    رنيم :الحمدلله انت عامل ايه ؟
    سامر : الحمدلله صحبتك اللى من غير اسم عامله ايه اكيد معاكى سلميلى عليها
    رنيم : اه معايا الله يسلمك بتقولك
    سامر : انا اتصلت امبارح علشان اكلمك بس كنتى مشيتى ما كنتش اعرف انه رقم صحبتك
    رنيم : اه روحت بيتنا بقى و صحبتى قالتلى اول ما شوفتها
    سامر : تمام .. انتى بقى بتدرسى ايه ولا بتعلمى ايه ؟ يوم ما اتقابلنا ماعرفتش عنك اى حاجه .
    رنيم : انا لسه حدخل اولى جامعه اهو بنبتدى نقول يا هادى ادعلنا بقى
    سامر : تمام حلو ربنا معاكى بس انا فاكر شكلك اللى يشوفك ما يقولش انك لمضه اوى كده شكلك شقيه و لمضه
    رنيم : انا لالالا ابدا انا غلبااااااااااااااانه و طيبه اصلا
    سامر : ههههههههههههه واضح واضح
    رنيم : و انت بقى بتعمل ايه فى حياتك
    سامر : انا اتخرجت خلاص السنه اللى فاتت و بشتغل فى مجال التسويق
    رنيم : اها اتخرجت بقى يلا عقبالنا احنا كمان الا قولى هو انت اى حد بيرن ولا بيتصل عليك تتصل عليه تانى كده من غيرماتعرفه انت فاضى ولاايه يا عم انت
    سامر : ههههههههههههههههه مش قلتلك لمضه يا عم انت ايه بس لا يا بنتى انا بشتغل فى مجال التسويق و احيانا فى عملاء بيتصلوا والخط بيقطع او مش بكون رديت عليهم برجع اتصل بيهم تانى يا لمضه
    يلا بقى حقفل دلوقتى علشان اخلص الشغل اللى ورايا سلميلى على صحبتك
    رنيم : اوكى يلا روح شوف شغلك مع السلامه
    سامر : معا لسلامه .

    * عدى يومين و بعدها اتصل سامر تانى على داليا
    داليا : الو
    سامر : الو ازيك
    داليا : الحمدلله انت ازيك؟
    سامر : الحمدلله
    داليا : رنيم مش عندى
    سامر : طب هى عامله ايه ؟ و مش باينه ليه؟
    داليا : الحمدلله هى كويسه بس مشغوله مع باباها شويه علشان مسافر
    سامر : طب تمام سلميلى عليها كتير مش عايزه تقوليلى اسمك ايه برضو ؟
    داليا : هو انت عايز تعرف اسمى ليه ؟
    سامر : علشان اعرف انابكلم مين .. هو انتى اسمك وحش للدرجه دى ؟
    داليا : لا طبعا اسمى مش وحش على فكره بقى انت قليل الذوق
    سامر : طب ليه كده بس اولا انتى مش عايزه تقولى اسمك ازاى تكلمى حد تعرفى اسمه و كل حاجه عنه و هو ما يعرفش اسمك ؟ دى بقى اللى تبقى قله ذوق
    داليا : على فكره انت بنى ادم مستفز
    و قفلت داليا السكه
    بعدها اتصلت داليا برنيم و حكت لها كل المكالمه
    رنيم : اهدى يا بنتى مش مستاهله كل العصبيه دى هو حاول يستفزك علشان يعرف اسمك
    داليا : لالا يا بنتى ده بنى ادم قليل الذوق و لو اتصل تانى اناحهزئه بقى هه
    رنيم : طب ماشى لما يكلمك زعقيله و اعملى فيه اللى انتى عايزاه بس اهدى ما يولع هو يا ستى المهم انتى
    داليا : طب ماشى الكلام بس يتصل بس اما وريته
    رنيم : اهدى بقى يا لوزتى الا زعلك انتى انا كمان حتصل عليه و ازعقله اقفلى و انا حكلمك تانى
    اتصلت رنيم على سامر من رقمها
    رنيم : الو سامر
    سامر : الو ايوه ازيك يا رنيم
    رنيم : انت عرفت منين انى انا
    سامر : صوتك معروف يا بنتى المهم انتى عامله ايه و اختفيتى تانى ليه
    رنيم : انا تمام الحمدلله بس زعلانه منك بصراحه
    سامر : ليه بس عملتلك ايه ؟
    رنيم : انت كلمت داليا و قعدت تقولها انها قليله الذوق و ان اسمها وحش و بتستفزها كتير
    سامر : الله اسمها داليا ما اسمها حلو اهو امال فى ايه مخبياه ليه
    انا مش بقصد و الله انى ازعلها بس انا كنت عايز اعرف الاسم اللى بتكلم معاه بس وهى اللى بداءت على فكره و قالتلى انى قليل الذوق
    رنيم : انت ضايقتها كتير على فكره و دى مش صحبتى بس دى اختى كمان احنا صحاب من زمان اوى و هى صحبتى انتيمتى كمان
    سامر : خلاص اناحصالحها مش تزعلى انتى كمان صحيح بقى احنا مش حنشوف بعض ولا ايه حنفضل كده فى الفون
    رنيم : ايه يا عم كده من اولها اشوفك و نتقابل لا اصبر بقى كده
    المهم دلوقتى انت زعلت داليا كتير شوف حتصالحها ازاى و انا مش حكلمك تانى قبل ما تصالحها
    سامر : ماشى يا ستى انا حصالحها ما تشغليش بالك ده انتى عشره سنين ما اعرفكيش ههههههههههه
    رنيم : هههههههههههههه ماشى ياعم يلااقولك سلام بقى
    سامر : سلام يا قمر

    * عدى يومين و اتصل سامر ب داليا
    داليا جت فرصتى اما وريتك
    داليا : الو
    سامر : الو من الاول كده مش متصل علشان اتخانق معاكى انا اسف يا ستى و حقك عليا
    داليا : طب ده انا اتخانق معاه ازاى ده بقى امممممممم خلاص ماشى انت متصل ليه بقى
    سامر : ما قلتلك يا بنت الناس انا متصل اعتذرلك انى زودت الهزار معاكى و انتى مش تعرفينى
    داليا : خلاص عادى مافيش مشكله و على فكره اسمى داليا يعنى اسمى مش وحش ولا عندك اعتراض عليه
    سامر : لالا اسمك جميل جدا على فكره ده معناه الزهره صح
    داليا : اه شكرا بقى انا حقفل علشان ورايا حاجات
    سامر : طب ماشى مع السلامه
    داليا : مع السلامه

    *عدت فتره الصيف و كان دايما سامر و رنيم على اتصال و كل فتره كان بيسالها على داليا بحكم انها صديقتها وانه هو و رنيم اصحاب كتير و بقت بتثق فيه
    جت فتره الجامعه
    و دخلو الجامعه و فضلوا مع بعض فى كل مكان و جت رنيم فى مره واتفقت مع سامر انهم يتقابلوا مع بعض و انه يستناها قدام الجامعه
    جه اليوم اللى حيتقابلوا فيه
    و قالت رنيم لداليا احنا حنشوف سامر النهارده

    داليا : حنشوفه ازاى يعنى
    رنيم : اتفقت انا و هو انه يجى عند الجامعه و نشوف بعض
    داليا : يا بنتى كده لو شافنا ممكن يعرف انك مش اللى قابلها لو لسه فاكر شكلى زى ما قال
    رنيم : طب و بعدين بقى
    داليا : شوفتى المره اللى اتصرفتى فيها من غير ما تقوليلى عملتى ايه يا بنتى انتى عمرك ما حتعقلى
    رنيم : خلاص يشوفنا و لو عرف يميزنا تمام مش عرف خلاص بقى

    و فعلا جه سامر زى ما اتفقوا واتقابلوا ال 3
    سامر : ازيكم
    رنيم و داليا : الحمدلله
    سامر ينظر لداليا : ازيك يارنيم و اخبار الجامعه ايه معاكى كل ده لحد مااشوفك يا بنتى
    داليا ترتبك و تنظر ل رنيم : أنا تمام الحمدلله كله كويس
    سامر موجه لرنيم : ازيك انسه داليا عامله ايه ؟
    تضحك رنيم : الحمدلله انا تمام اوى على فكره
    اتكلمو شويه ال 3 و فضلت داليا مش مستوعبه الموقف اللى حوليها بس متابعه معاهم
    و فى الاخير استأذن منهم سامر و مشى

    و بليل اتصل على رنيم الو : ازيك يا رانوا عامله ايه؟
    رنيم : الحمد لله تمام ايه يا عم الشياكه اللى انت فيها دى كنت جميل
    سامر : ايه يا بنتى ده المفروض انا اللى اقولك كده ده انتى مصيبه ما حدش يقدر عليكى بس خدى بالك مش ينفع تعاملى كل الناس كده يا رانوا ممكن حد يفهمك غلط يا بنتى
    و يكمل سامر : بس انتى لسانك طويل و بتعرفى تبقى لمضه فى الفون بس و لما شوفتك وش لوش كنتى زى الكتكوت الصغير اللى بيدور على امه ههههههههه
    رنيم : انا كنت شبه الكتكوت ماشى يا عم اما وريتك
    سامر : بس داليا صحبتك كانت فرى مش زى ما كلمتها فى الفون
    رنيم : بجد طب ايه رايك بقى فى داليا ؟
    سامر : حلوه و مرحه كده
    رنيم : حلوه بس دى زى القمر يا عم انت
    سامر : ماشى يا قمر هى زى القمر و انتى كمان على فكره شكلك مش اتغير عن ما شوفتك
    رنيم : ياااااااه يا عم ايه الذاكره دى انت لسه فاكر
    سامر : اه لسه فاكر يلا بقى روحى ذاكرى يا بت انتى و انا حقوم نام عندى شغل الصبح
    رنيم : اشطه يلا سلامو يا عم
    سامر : اشطه و سلامو انتى يا بت بتشتغلى ميكانيكى بعد الضهر قومى نامى سلام

    * كثرت المكالمات و المقابلات بينهم و فى كل مره داليا بتكون معاهم و بيتكلم معاها على انها رنيم حست داليا انها بقت مبسوطه فى كل مره بتشوفه
    و نفس الاحساس ابتدى ينموا برضوا عند رنيم
    كان احساس غريب عليهم هما الاتنين حبوا يصارحوا بعض بس جواهم ما فيش حاجه اكيده
    بس كان الفرق بالنسبه لداليا لانها حاسه انه مش من حقها تفكر فيه لانه بيكلم و بيتعامل مع رنيم مش معاها هى
    و اكيد اذا حب او حس حيبقى برنيم مش بيها
    فى مكالمه من المكالمات بين رنيم و سامر اعترف سامر لرنيم بحبه لها

    سامر : ازيك يا رانوا عامله ايه ؟
    رنيم : الحمدلله تمام انت عامل ايه ؟
    سامر : الحمدلله انتى فاضيه ؟
    رنيم : اه فاضيه مالك جد كده ليه
    سامر : رنيم انا معجب بيكى و بحبك و كنت حابب اتقدملك لو موافقه ايه رايك؟
    رنيم : ايه يا عم جو انور وجدى ده بطل هزار
    سامر : على فكره انا بتكلم جد مش بهزر فكرى و ردى عليا و بأكد عليكى انا بتكلم جد
    رنيم : اوكى يا سامر ماشى
    سامر : يلا خدى بالك من نفسك تصبحى على خير
    رنيم : و انت كمان تلاقى الخير

    * رنيم اتصلت بداليا و حكت لها على اللى حصل كالعاده

    رنيم : انا مش عارفه اعمل ايه يا داليا ؟
    داليا : طب انتى حاسه انك معجبه بيه او بتحبيه
    رنيم : مش عارفه بصراحه انا بحب اتكلم معاه اوى و بكون مبسوطه لما بشوفه حتى و هو بيكلمك على اساس انك انا ... بس تفتكرى حيفضل يحبنى حتى لما يعرف الغبطه دى
    داليا : هو حبك علشانك انتى و بشخصيتك انتى يعنى الشكل مش مهم و بعدين انتى اصلا حلوه وزى القمر مش تهتمى و لمايسالك تانى قوليه الحقيقه و هو اكيد مش حتفرق معاه
    رنيم : بس هو فى كل مره كان حابب شخصيتك و انتى معاه اكتر من الفون خلاص انا حقوله و اشوف حيعمل ايه ؟
    داليا : تمام يلا بقى نامى علشان محاضرات بكره كتيراوى تصبحى على خير
    رنيم : ماشى تصبحى على خير

    * ولا داليا نامت من كتر ما فكرت و زعلت ان حتى الحلم ما بقاش من حقها تفكر فيه و رنيم بتفكر يا ترى حيعمل ايه لما يعرف و حيفضل يحبها ولا لا؟
    عدى يومين و بعدها اتصل سامر ب رنيم

    سامر : الو ازيك رانوا عامله ايه ؟
    رنيم: الحمدلله انت ازيك ؟
    سامر : الحمدلله تمام فكرتى ولا لسه
    رنيم : فكرت
    سامر : طب و رايك ايه ؟
    رنيم : سامر انا معجبه بيك برضوا مش بنكر ده بس في حاجه لازم تعرفها قبل اى شىء
    سامر : خير فى ايه يارانوا؟؟!!!
    رنيم : لا مش حينفع فى الفون لازم نتقابل و افهمك كل حاجه و بعدها قرر انت
    سامر : طب تمام تحبى نتقابل امتى ؟
    رنيم : خلينا بكره اليوم النهارده كله محاضرات كتير و مش حينفع
    سامر : طب تمام خدى بالك على نفسك مع السلامه
    رنيم : و انت كمان .. مع السلامه

    * طلبت رنيم من داليا انها تكون معاها و هى بتقول ل سامر على الحقيقه داليا رفضت و قالت لها لازم تكونوا لوحدكم و شجعتها و اديتها ثقه فى نفسها اكتر واتفقت معاها اانها تطمنها عليها ديما
    وفعلا راحت رنيم تقابل سامر

    سامر : ازيك داليا امال رنيم فين ؟
    رنيم : الحمدلله ما هو ده الموضوع اللى كنت عايزاك فيه
    سامر : انا مش فاهم بتقصدى ايه
    رنيم : يوم ما كلمتك انت عرفت ان اسمى رنيم بس يوم مااتقابلنا انت كنت لسه فاكر شكل داليا و افتكرت وقتها انها رنيم مش داليا
    سامر : طب ليه و قتها ما وضحتيش الكلام ده ؟؟ يعنى حبيتى تلعبى و تهزرى و تتسلى و خلاص يعنى كت لعبتكم القديمه ؟!!
    رنيم : انا ما كنتش فاكره ان الموضوع حيوصل بينا لكده و خوفت وقتها لما اقولك تبعد و مش تكلمنى تانى
    سامر : و انتى شايفه دلوقتى انى ممكن اكمل معاكى ؟!!
    رنيم : انا قلتلك على كل حاجه و شوف انت حابب تعمل ايه و بلاش ترد عليا دلوقتى خد وقتك و فكر برضوا و انا مش حزعل من قرارك
    سامر : اوكى انا مضطر امشى دلوقتى علشان شغلى مع السلامه
    رنيم : ماشى مع السلامه

    * اتصلت رنيم ب داليا و قالتلها انا حجيلك دلوقتى انا محتاجاكى اوى
    داليا : ادخلى رانو مالك قلقتينى حصل ايه بس
    رنيم : حكيتله على كل اللى حصل اتضايق جداا و قالى انه عنده شغل و مشى
    داليا : خلاص سبيه يهدى و اكيد لو بيحبك بجد حيسامحك مش تزعلى ولا تعيطى يا رانو رانوا ديما جامده ولا بيفرق معاها حاجه خليكى ديما كده انا بتسند عليكى مش ينفع تضعفى رانوااا

    * فضلت داليا تطيب رنيم و تقويها و ترجع لها ثقتها بنفسها و وصلتها لبيتها و رجعت تانى و اتصلت على سامر
    رفض سامر انه يرد عليها بعتتله رساله

    اناعارفه انك مش عايز ترد عليا او على رنيم فى الوقت ده حقك تضايق بس رنيم مش كدبت عليك فى اى حاجه انت اللى فهمت غلط و هى كانت ابتدت تعجب بيك و خافت تبعد عنها و اظن لو بتحبها حتسامحها انت حبيت شخصيتها مش شكلها يبقى مش حيفرق معاك غير شخصيتها ياريت ما تظلمهاش لانها حبتك و لما انت صارحتها قالتلك الحقيقه و مش خبت عليك اى حاجه فكر براحتك فى كل حاجه بس ما تظلمهاش شكرا

    سامر اتصل ب داليا بعد ما قرى الرساله
    داليا : الو
    سامر : الو ازيك يا داليا
    داليا : الحمدلله
    سامر : انا قريت الرساله اللى بعتيها بس انتى ولا رنيم حتفهموا اللى انا فيه
    داليا : ازاى يعنى ؟؟
    سامر : انا فعلا حبيت رنيم بطريقتها اللى بتكلمنى فيها فى الفون بس حبيت خجلك انتى اللى كان قدامى وده كان محسسنى ان رنيم بتجمع بين الاتنين و المشكله الاكبر انا ما حستش برنيم الا لما شوفتك انتى من اول مره يعنى حبيتكم انتم الاتنين بشخصيه كل واحده فيكم انتوا لعبتوا و انا وقعت فى لعبتكم تقدروا تلاقوا حل للى وصلتونى ليه ؟؟ فكروا و ردوا ده لو ليها حل

    * سكتت داليا و قفلت مع سامر جوها جزء من فرحه بس مكسوره بجرح صحبتها و بتفكر تقولها ازاى الكلام ده
    عدت داليا اليوم ده و الصبح اتصلت تطمن على رنيم

    داليا : الو ازيك رانوا عامله ايه النهارده؟
    رنيم : الحمدلله انتى ازيك؟
    داليا : الحمدلله .... رانوا
    رنيم : فى ايه يا داليا وراكى حاجه قولى يا بنتى انا مش لسه حعرفك
    داليا : انا بعت رساله لسامر امبارح و هو كلمنى و حكت لها على كل الكلام
    رنيم : ازاى يعنى بيحبنا احنا الاتنين ده اتجنن ولا ايه ازاى يقول كده ... داليا انتى حاسه بحاجه لسامر ؟؟
    داليا : لا يا بنتى انتى اتجننتى ولا ايه ؟ انتى بتحبيه ما ينفعش انا احس بحاجه من نحيته
    رنيم : اناعارفه و واثقه فيكى جدا يا داليا انا لقيت الحل
    داليا : حل ايه اللى لقتيه
    رنيم : انا حبعد عنه و مش حتكلم معاه تانى انا مش حبيته اوى يعنى ده مجرد اعجاب يعنى فتره و حتعدى بصى يا داليا لو انتى حاسه بحاجه من نحيته انا مش حتضايق
    داليا : ايه يا بنتى الجنان ده هو كيس شيبسى حنعزم على بعض بيه بعدين هو قال بيحبك انتى هو بس مش عارفه ياخد قرار دلوقتى هو حيرجعلك تانى مش تقلقى
    رنيم : حتى لو رجع تانى مش حينفع يا داليا لانه فى البدايه حبنا احنا الاتنين يبقى البعد عنه افضل من البدايه كده كده مش حينفع اكمل معاه بابا كلمنى بليل و قالى اننا حنسافر
    داليا : حتسافروا فين ؟؟ انتى حتسيبنى لوحدى يا رانوا انتى عارفه ماعنديش حد اقرب منك
    رنيم : مش بأيدى و الله بس بابا قال امبارح اننا نبداء كل ترتيبات السفر حتى الدراسه حكمل بره مش هنا علشان كده بقولك لو حاسه بحاجه من نحيه سامر انا مش حزعل ده حقكم
    داليا : بطلى هبل يا بت انتى اللى حب اختى ما ينفعش احبه بالطريقه دى

    * حضنوا بعض وقررو انهم طول فتره ترتيبات السفر حيكونوا مع بعض طول الوقت و حيفضلوا مع بعض حتى لما تسافر رنيم الاتصال كل يوم بينهم
    رنيم اتصلت بسامر و قالتله قرارهم و قفلوا مع بعض و هما اصحاب
    سافرت رنيم و فضلت داليا لوحدها و عدى 6 شهور على احساسها بالوحده
    رغم اتصالها الدائم ب رنيم
    و فى يوم لقت موبيلها بيرن رقم غريب ردت

    داليا : الو
    : داليا معايا
    داليا : ايوه مين حضرتك ؟
    : سامر
    سكتت داليا




    سامر : الو داليا انتى سمعانى
    داليا : ايوه سمعاك بس مستغربه
    سامر :مستغربه انى بتصل بيكى انا عارف
    داليا تقاطعه : رنيم اتكلمت معاك قبل ما تسافر صح و فهمتك الحل
    سامر : ايوه حصل ده و قفلنا مع بعض اصحاب
    داليا : طب بتتصل عليا ليه ؟ رنيم سافرت و سبب كلامى معاك رنيم مش اكتر
    سامر : انا عارف ان رنيم سافرت و كل فتره بنتكلم مع بعض
    بس انا محتاج اقابلك واتكلم معاكى و ياريت ما ترفضيش
    داليا : انا اسفه مش حينفع اشوفك مع السلامه
    سامر : ياريت تفكرى يا داليا حعتبر نفسى ما سمعتش اجابتك مع السلامه

    * قفلت داليا مع سامر و فضلت مستنيه الوقت اللى بتكلم فيه رنيم كل يوم علشان تحكيلها اللى حصل
    فتحت النت و فضلت مستنياها لقت رنيم دخلت و اتكلمت معاها و سلموا على بعض ولقت رنيم بتكلمها على سامر
    رنيم : داليا سامر كلمنى من شويه و قالى انه عايز يشوفك و يتكلم معاكى و انتى رفضتى ليه عملتى كده ؟
    داليا : اقابله ليه بس خلاص ما بقاش فى حاجه علشان اكلمه او اشوفه انا كنت بعمل كده علشانك
    رنيم : داليا بصى انا الموضوع ده انتهى بالنسبه ليا و كمان انا حسيت و اتأكدت ان سامر حبك انتى و بالنسبه ليه انا كان معجب بالبنت الشقيه بس حب البنت الطيبه يعنى حبك انتى
    داليا : مش حينفع يا رانوا اناعارفه و واثقه كويس
    رنيم : اديله و ادي نفسك فرصه علشان خاطرى انزلى و قابليه ولو مش ارتحتى خلاص
    و فضلت رنيم تقنع داليا انها تشوف سامر

    * بعدها بيومين اتصل سامر على داليا و وافقت انها تقابله

    حاول سامر انه يقنع داليا انه بيحبها و انه الفتره اللى فاتت دى كلها كان بيحاول بيتأكد من مشاعره وانه لقى نفسه بيحبها جدا و طلب منها انها تديله فرصه علشان يثبت لها ده
    بعد ما فكرت داليا وافقت انها تديله فرصه و تدى نفسها فرصه لانها فى البدايه كانت معجبه بيه
    فضلوا مع بعض شهرين تقريبا بيتقابلو و بيتكلموا مع بعض كل يوم
    و كل ما بيحصل حاجه بتحكيها لرنيم
    بس اللى ما قدرتش تحكيهولها انها حاسه انها موجوده بينها و بين سامر طول الوقت
    و جه قرارها انها مش حتكمل مع سامر و قابلته و قالتله احساسها ده حاول يفهمها تانى انه مش حاسس برنيم غير صديقه مش اكتر فهمته هى انها مش قارده تكمل و بتتمناله يقابل اللى يحبها و تحبه بس هى لا رغم انها حبته جدا
    و طلبت منه ما يقولش لرنيم السبب ده وافق سامر
    اتصلت رنيم ب داليا علشان تطمن عليها لقت داليا بتبلغها بخبر انفصالهم انهم الاتنين ما ارتحوش مع بعض
    فضلت رنيم تواسى داليا بدروها
    و عدى فتره طويله و الموضوع انتهى تقريبا من الكلام فيه
    و فى يوم رنيم اتصلت ب داليا علشان تبلغها ان فى حد اتقدم لباباها و هى تقريبا موافقه فرحت اوى داليا
    داليا : ها بقى اسمه ايه اللى امه دعيا عليه
    رنيم : ههههههههه سامر يا ستى
    داليا : سامر !!! سامر اللى نعرفه ؟؟
    رنيم : لالا يا بنتى مش سامر ده .. داليا انتى لسه بتحبى سامر مش كده؟؟
    داليا : لالا يا بنتى ايه اللى بتقوليه ده
    رنيم : على فكره سامر بيسألنى عليكى كتير انا مش كنت عايزه اقولك علشان مش تضايقى
    بس انتى كده حرام عليكى انتى بتحبيه و هو بيحبك اى كان الخلاف حتقدروا تتخطوه مع بعض بالتدريج
    داليا : سيبك منى المهم انتى فرحانه .. ها بقى خلاصنا من اسمه قولى سنه و عنوانه طلعى بطاقته من الاخر
    رنيم : ههههههههههههه ماشى يا ستى غطى على الكلام بس مهما عملتى لينا كلام تانى و بعدين مش حينفع اتخطب و انتى لسه بقى لازم نكون مع بعض
    على فكره سامر قالى انه بيروح عند الجامعه علشان يشوفك ديما
    داليا : انا شوفته مره فعلا بس مشيت ومش اتكلمت معاه
    رنيم : حرام عليكى يا بنتى اللى بتعمليه في نفسك و فيه بصى يا داليا السبب اللى كان بعدك عن سامر اظن كده انتهى يبقى بلاش تعاندى فى نفسك
    داليا : سبب ايه اللى بتقولى عليه احنا ما ارتحناش مع بعض
    رنيم : داليا انتى اصلا مش بتعرفى تكدبى يوم ما جيتى تكدبى ما عرفتيش بس انا سكتت و مش رضيت اضايقك علشان عارفه انك عناديه اظن السبب خلص كده و كفايه عند
    داليا : سبيها بظروفها المهم فرحتنا بيكى
    رنيم : شكلك يا بت انتى مش حتيجى بالذوق ماشى
    و قفلوا مع بعض و هما فرحانين بخبر خطوبه رنيم

    * بعدها بكام يوم بابا داليا نداها علشان يتكلم معاها هى و مامتها وقالهم ان النهارده جاله واحد فى الشغل و طلب داليا منه و اداهم معاد كمان يومين يجوا البيت فيه هو و اهله هزت داليا راسها بالموافقه و دخلت اوضتها من غير ما تسال على اى حاجه
    بعدها فتحت نت
    و كلمت رنيم و حكت لها على اللى حصل رنيم قالتها مبروك كويس حنتخطب سوا بقى انتى فرحانه صح
    داليا : عادى مش حاسه بحاجه
    رنيم : ليه هو انتى بتحبى حد ولا ايه ؟
    داليا : لا مش بحب حد بقولك اناحقوم انام و بكره نتكلم تانى
    و قفلت داليا مع رنيم و ما عرفتش تنام مش عارفه اذا كان اللى حتمشى فيه ده صح ولا غلط
    و جه اليوم اللى جاى فيه العريس هو و اهله و فضلت داليا تفكر كتير
    باباها طلب من مامتها تناديها تقعد معاهم و دخلت داليا باباها طلب منها تسلم عليهم مدت ايدها سلمت على الام و الاب و هى بتبتسم و جت تسلم على الشاب لقيته سامر فضلت متسمره مكانها و مش عارفه تتحرك ضحك و باباها قالها اقعدى قعدت بس ما بقتش عارفه تعمل ايه ؟ بعد دقايق لقت موبيلها بيرن
    لقت رنيم هى اللى بتتصل استأذنت منهم و ردت عليها

    رنيم : ها ايه اخبار العريس
    داليا : انتى كنتى عارفه انه هو
    رنيم / ما انا قلتلك انتى مش حتيجى بالذوق كان لازم الامر الواقع
    الف مبرووووووووووك يا عروستى القمر بقولك ايه اتقفوا على نفس يوم خطوبتى و استنوا الفرح لما ننزل مصر نعمله سوا بقى
    داليا : هههههههههه ماشى يا مجنونه بحبك اوووووووووى حقوم اقعد مع الناس بقى
    واتفقوا فعلا على الخطوبه فى نفس يوم خطوبه رنيم
    و لما رنيم نزلت مصر مع اهلها فضلوا يعملو تجهيزات الشقه مع بعض و ساعدوا بعض فى كل جزء من تحضريات الفرح
    كل واحده فيهم بتجهز التانيه كأنها امها و فرحانه بيها بس قرروا ان الفرح كل واحده فى يوم علشان يقدرو يفرحوا ببعض اكتر
    و فضلوا مع بعض فى كل موقف فى حياتهم واقفين جنب بعض فى المر قبل الحلو حتى اولادهم بقوا اصحاب و ولاد خاله كمان لانهم مش اصحاب بس دول اكتر من الاخوات




    hgw]hrm hgwh]rm

    الأعضاء المٌعجبين بهذه المشاركة: حنايا الغيث

  2. #2
    ♥•- مشرفة سابقة -•♥
    تاريخ التسجيل
    Jul 2015
    العمر
    15
    المشاركات
    1,033
    الجنس
    أنثى
    وظيفتي
    تلميذة طموحة
    هواياتي
    باختصار شديد كل مايتعلق بالكتابة والتأليف..
    شعاري
    عش كل يوم وكأنه الأخير لأن احدهم سيكون كذلك

    افتراضي رد: الصداقة الصادقة

    شكرا جزيلا لكي ..

    قصة رائعة ..في قمة الابداع ..

    اتمنىان تفيدينا دائما بقصصك ..

    مع تحياتي ..

  3. #3
    -•♥ مشرفة وحي القلم ♥•-
    تاريخ التسجيل
    Jul 2015
    المشاركات
    1,035
    الجنس
    أنثى
    هواياتي
    اشغال يدوية
    شعاري
    لا اله الا الله

    افتراضي رد: الصداقة الصادقة

    قصة رائعة مع انها طويلة ولكنها غير مملة
    تقبلي مروري مع خالص تحياتي
    الأعضاء المٌعجبين بهذه المشاركة: ربيع الامنيات

  4. #4

    تاريخ التسجيل
    Sep 2014
    العمر
    17
    المشاركات
    502
    الجنس
    أنثى
    وظيفتي
    ادرس
    هواياتي
    احب الرسم و السباحة و التمثيل و الغناء
    شعاري
    القطرات القليلة تصنع جــدولاً

    افتراضي رد: الصداقة الصادقة

    الحمد لله ..انني قرأت قصتك هذه ..

    الحمد لله ..ان الله اعطانا نعمة مثلك ..

    لتفيدنا دائما ..

    فيا رباه لاتحرمنا منه !!

 

 

المواضيع المتشابهه

  1. هل هكدا تنتهي الصداقة : ( لمذا تباع الصداقة بهده السهولة ) ؟؟؟؟؟؟؟
    بواسطة حمامة الأقصى في المنتدى الحوار المتمدن
    مشاركات: 37
    آخر مشاركة: 28-04-2017, 17:02
  2. ربيعُ القلوب الصادقة ..!
    بواسطة بتول رضا في المنتدى من وحي القلم
    مشاركات: 3
    آخر مشاركة: 26-08-2014, 14:15
  3. النفس الصادقة
    بواسطة بتول رضا في المنتدى القصص و الروايات
    مشاركات: 1
    آخر مشاركة: 12-07-2014, 11:10
  4. هل هكدا تنتهي الصداقة : ( لمذا تباع الصداقة بهده السهولة ) ؟؟؟؟؟؟؟
    بواسطة حمامة الأقصى في المنتدى قسم المواضيع العامة
    مشاركات: 14
    آخر مشاركة: 22-11-2013, 02:31
  5. النية الصادقة
    بواسطة شمس الأصيل في المنتدى النكت و الالغاز
    مشاركات: 1
    آخر مشاركة: 14-06-2012, 20:29

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •